1 Chronicles 16

Ibhokisi Lesivumelwano SikaJehova Libekwa Ethenteni

1Balithwala ibhokisi lesivumelwano sikaNkulunkulu bayalingenisa ethenteni uDavida ayelilungiselele lona, banikela ngemihlatshelo yokutshiswa leyobudlelwano phambi kukaNkulunkulu. 2UDavida eseqedile ukunikela ngemihlatshelo yokutshiswa langeyobudlelwano, wabusisa abantu ngebizo likaJehova. 3Wababela bonke abako-Israyeli, abesilisa labesifazana, yilowo lalowo isinkwa, leqatha lenyama, lesinkwa sezithelo zevini ezonyisiweyo.

4Wakhetha abanye abaLevi ukukhonza phambi kwebhokisi lesivumelwano bedumisa uJehova, bebonga uNkulunkulu ka-Israyeli.

5Induna kwakungu-Asafi, uZekhariya engumsekeli, kulandela uJeyiyeli, loShemiramothi, loJehiyeli, loMathithiya, lo-Eliyabi, loBhenayiya, lo-Obhedi-Edomi kanye loJeyiyeli. Babezatshaya amachacho lemihubhe, u-Asafi etshaya izigubhu, 6abaphristi uBhenayiya loJahoziyeli bengabokuvuthela amacilongo phambi kwebhokisi lesivumelwano sikaNkulunkulu.

Ihubo Lokubonga KukaDavida

7Ngalolosuku uDavida wamisa ukuba u-Asafi labanye bakhe bahlabelele lelihubo bebonga uJehova:

8Bongani uJehova, litshumayele ibizo lakhe, lizazise phakathi kwabantu izenzo zakhe.

9Hlabelani indumiso kuye limhubele amahubo; likhulume ngezenzo zakhe ezimangalisayo.

10Jabulani ebizweni lakhe elingcwele; kazithokoze izinhliziyo zabo abafuna uJehova.

11Funani uJehova lamandla akhe, limdinge yena njalonjalo.

12Khumbulani izenzo zakhe ezimangalisayo azenzayo, izimangaliso azenzayo, lezahlulelo azikhulumayo,

13lina nzalo kaIsrayeli inceku yakhe, lina madodana kaJakhobe, bakhethiweyo bakhe.

14Yena unguJehova uNkulunkulu wethu; izahlulelo zakhe zigcwele wonke umhlaba.

15Uyakhumbula isivumelwano sakhe kuze kube nininini, ilizwi alitsho waliqinisa kuzo izizukulwana eziyinkulungwane,

16isivumelwano asenza lo-Abhrahama, isifungo asenza lo-Isaka,

17wasiqinisa kuJakhobe saba yisimiso, laku-Israyeli saba yisivumelwano esingapheliyo,

18wathi; “Ngizakunika ilizwe laseKhenani libe yisabelo sakho esiyilifa lakho.”

19Bathi beseselinani elincinyane, elincinyane impela njalo beyizihambi kulo,

20bezula ezizweni ngezizwe besuka komunye umbuso besiya komunye.

21Kavumelanga muntu ukubahlupha; wakhuza amakhosi ngenxa yabo,

22wathi: “Lingathinti abagcotshiweyo bami, lingalimazi abaphrofethi bami.”

23Hlabelani kuJehova lina, mhlaba wonke, limemezele insindiso yakhe izinsuku ngezinsuku.

24Fakazani ubukhosi bakhe phakathi kwezizwe, lemisebenzi yakhe emangalisayo phakathi kwabantu bonke.

25Ngoba umkhulu uJehova, ufanele ukudunyiswa kakhulu, uyesabeka ukwedlula onkulunkulu bonke.

26Ngoba bonke onkulunkulu bezizwe bayizithombe; kodwa uJehova wadala amazulu.

27Inkazimulo lobukhosi kukuye. Amandla lentokozo kusendaweni yakhe yokuhlala.

28Mnikeni uJehova, lina zizukulwana zezizwe. Mnikeni uJehova udumo lamandla.

29Mnikeni uJehova udumo olufanele ibizo lakhe. Lethani umnikelo lize phambi kwakhe. Mkhonzeni uJehova, lembethe okungcwele,

30lithuthumele phambi kwakhe, mhlaba wonke; umhlaba ugxilile ungeke wagudluzwa.

31Kawathokoze amazulu, lomhlaba ujabule, kabathi phakathi kwabezizwe, “UJehova uyabusa.”

32Kaluhlokome ulwandle lakho konke okukulo. Lamaganga athabe lakho konke okukuwo.

33Ngakho izihlahla zasendle zizahlabela ngentokozo phambi kukaJehova, ngoba uyeza ukwehlulela umhlaba.

34Bongani uJehova ngoba ulungile. Uthando lwakhe olungapheliyo lumi kokuphela.

35Celani lithi: “Sikhulule, O Nkulunkulu mkhululi wethu, usibuthe usikhulule phakathi kwezizwe, ukuba sibonge ibizo lakho elingcwele, ukuze sijabule ngokukudumisa.

36Kabongwe uJehova, uNkulunkulu ka-Israyeli, kusukela endulo kuze kube nininini. Bonke abantu bathi: “Ameni. Kabongwe uJehova!”

37UDavida wasetshiya o-Asafi labakhula bakhe ukuba bagcine ibhokisi lesivumelwano sikaJehova, bakhonze njalo benze konke okufanele kwenziwe lapho ngezinsuku zonke. 38Abanye abatshiya lapho ukuze bakhonze labo ngo-Obhedi-Edomi labakhula bakhe, ababengamatshumi ayisithupha laficamibili. U-Obhedi-Edomi indodana kaJeduthuni, kanye loHasa babengabalindi bamasango.

39UDavida watshiya uZadoki umphristi kanye labanye abaphristi phambi kwethabanikeli likaJehova endaweni ephakemeyo yokukhonzela eGibheyoni 40ukunikela kuJehova imihlatshelo yokutshiswa e-alithareni ngezikhathi zonke, ekuseni lantambama, njengokulotshiweyo eMthethweni kaJehova, awupha abako-Israyeli. 41Abanye abasala labo babengoHemani loJeduthuni labanye bonke balabo ababekhethiwe beqanjwa ngamabizo ukuba badumise uJehova, “ngoba uthando lwakhe lumi kuze kube nininini.” 42UHemani loJeduthuni babengabokuvuthela amacilongo lokutshaya izigubhu lamanye amachacho ezingoma ezingcwele. Amadodana kaJeduthuni ayehlala esangweni.

43Abanye bonke basuka, ngulowo lalowo waqonda emzini wakhe, uDavida wabuyela emzini wakhe ukuyabusisa abendlu yakhe.